Assalamu’alaikum Warahmatullahi Wabarakatuh
Bismillahirrahmanirrahim. Alhamdulillahirabbil ‘alamin
assalatu wassalamu ‘ala asrafil ambiya’I wal mursalin, sayidina Muhammadin wa
ala alihi wasahbihi ajma’in, rabisrohli shodri wayasirli amri wahlul u’datan
min lisani yaf qahu qauli, amma ba’du.
Panjenenganipun Kepala Dinas Dikpora Bantul, Bapak
Drs. Didik Warsito M.Si. ingkang kinurmatan. Panjenenganipun Bapak Tri Kartika
Rina M.Pd. minangka Kepala SMP N 1 Bantul ingkang satuhu kinurmatan. Bapak/Ibu
guru, karyawan/karyawati ingkang kula hormati. Bapak/Ibu wali siswa saha para
tamu undangan ingkang dhahat kinurmatan. Sarta para wisudawan/wisudawati saha
adhik kelas X lan XI ingkang kula tresnani.
Langkung rumiyin mangga kula lan panjenengan sedaya
tansah ngonjukaken puji lan syukur wonten ngarsanipun Gusti Allah ingkang Maha
Asih, ingkang sampun paring mapinten-pinten kanikmatan lan kasarasan saengga
ing wekdal menika kula lan panjenengan saged nyawiji ing papan menika bagas
waras boten kirang setunggal menapa.
Para rawuh ingkang minulya, kula minangka wakil
wisudawan saking kelas XII, ngaturaken agunging panuwun dhumateng Bapak/Ibu
guru awit saking sih katresnan anggenipun nggulawenthah kula lan kanca-kanca.
Saengga kula lan kanca-kanca saged ngrampungaken kewajiban anggen kula sakanca
ngangsu kawruh wonten ing pawiyatan SMP N 1 Bantul menika. Kula sakanca namung
saged memuji, mugi-mugi sedaya amal lan kesaenan Bapak saha Ibu guru pikantuk
piwales saking Gusti Allah ingkang Maha Agung. Saha tansah pinaringan
kasarasan, kawilujengan, lan katentreman, saengga saged nggulawenthah dhateng
adhik-adhik kelas sedaya ngantos dumugi paripurna kanthi biji ingkang
maremaken. Mboten kesupen, kula sakanca ugi nyuwun pangapunten awit sedaya
kalepatan, asring damel Bapak/Ibu guru duka lan kuciwa saking atur saha solah
bawa kula sakanca ingkang mboten mranani ing penggalih Bapak/Ibu guru sedaya.
Salajengipun kula lan kanca-kanca nyuwun donga pangestunipun suopadhos saged
pikantuk pawiyatan ingkang langkung sae lan saged nggayuh cita-cita. Dados
titah ingkang migunani tumraping agami, bangsa, lan negari.
Dhumateng Bapak/Ibu guru lan adhik-adhik sedaya,
sepisan malih kula ndedonga mugi tansah pinaringan rahmat saha barokahing Gusti
Allah. Aamiin. Wasana cekap semanten atur kula, menawi kathah kalepatan atur
saha solah bawa ingkang mboten mranani ing penggalih panjenengan sedaya, saestu
kula nyuwun pangapunten. Matur nuwun.
Wassalamu’alaikum Warahmatullahi Wabarakatuh
0 Comments